Uşaqlarda kəllə-beyin travması

Yeriməyə yeni başlayan və yerində dayanmağı sevməyən uşaqlar tez-tez yıxılırlar və başlarını sərt yerlərə vuraraq ata-analarını qorxuya salırlar. Adətən, bu travmalar ciddi problemlər təşkil etmədən başda şişlik və ya bir neçə göyərmə ilə keçib gedir. Əgər uşaq öz boyundan daha yüksək hündürlükdən yıxılarsa bu daha ciddi travmalara səbəb ola bilər. Əhəmiyyətsiz bir yıxılmanı ciddi bir kəllə-beyin travmasından ayırmaq üçün bəzi əlamətlərə diqqət etmək lazımdır.

Əgər travmadan sonra…

• Uşaq huşunu itiribsə;

• Nəfəs alıb-verməkdə çətinlik çəkirsə;

• Qıcolmaları olursa;

• Qulaq, burun və ya ağızdan qan gələrsə;

• Qulaq və ya burundan suya bənzər şəffaf bir maye gələrsə;

• Uşaqda dayandırıla bilməyən bir ağlama və ya narahatlıq varsa;

• Qarşısı alına bilməyən yuxululuq varsa;

• Travmadan sonra 3 dəfədən çox qusması olursa;

• Getdikcə artan baş ağrısı varsa mütləq həkimə müraciət etmək lazımdır.

Əgər yuxarıda sadalanan əlamətlərdən heç biri yoxdursa, öncə uşağı sakitləşdirmək lazımdır. Başını vurduğu yerə buz və ya soyuq kompres qoymaq lazımdır ki, şişkinlik əmələ gəlməsin.

Bəzi hallarda uşaqlar kiçik travma keçirsələr də, bir neçə gün halsızlıq, yorğunluq, baş ağrısı, ürəkbulanma kimi əlamətlər hiss edə bilərlər. Bu adətən travma zamanı beyin silkələnməsinin nəticəsində baş verir. Bu əlamətlər əksər hallarda zamanla azalıb keçir. Əgər şikayətlər davam edib uşağı çox narahat edirsə, o zaman bu əlamətlərə uyğun müalicə ilə uşağı rahatlandırmaq mümkündür. Bundan başqa ev şəraitində də ehtiyac olarsa ağrıkəsici verə bilərsiniz. Hər şey normal olsa da, travmadan sonra uşaqları 24 saat nəzarətdə saxlamaq lazımdır. Bu müddət ərzində əgər uşaqda qeyri-adi hallar müşahidə olunarsa mütləq həkimə müraciət etməlisiniz.